موضوع: اللي عملت كده مع حد ممكن تعمله مع حد تانى !! صدمه ف الحب

السلام عليكم ورحمة الله وبركاتة
القصة دى انا قرايتها فى منتدى من المنتديات
وقولت احطها هنا واشوف رايكم فى الموضوع ده
تعالو نقراها سوى ونفيد بعض

الموضوع بيتكلم عن

الـصـدمـة




الحكاية ..


هو.. واد راجل كده في تصرفاته و طبعه .. طالب في اخر سنة في الكلية ..
هي .. بنت ستايلش و روشة واحيانا لدرجة مأفورة .. و خلصت تعليمها ..



هو شافها .. كان معجب بيها .. كلمها و إتعرفوا ع بعض و بدأوا يقربوا لبعض اوى ..
حبها و إعترفلها بحبه .. وهي كمان كانت حاسة و قالتله وانا كمان بحبك ..

عاشوا فترة سوا و كان مبيسبوش بعض ابدا .. كانوا بيحبوا بعض اوى ..
يزعلوا .. يتصالحوا .. بس هو ماشفش منها حاجة وحشة طول الوقت ده ..
هو مكانش يعرف عن ماضيها كتير .. ومفيش ناس تعرف عنها كتير لأنها جديدة في المنطقة .. بس كان في ناس بتتكلم عن لبسها و طريقتها ..

عدي الترم الأول بتاعه ..

هي
قالتله : في حد من قرايبنا ممكن يقف جنبك و يساعدك قدام بابا و انا بعتبره
اخويا الكبير و بحكيله كل حاجة و حكتله عنك .. عايزاك تقابله و تبقوا
اصحاب ..
هو قابل قريبها و الكلام دار بينهم .. وقريبها أعجب جدا بهو ..

هي حبها ليه زاد و إطمنت بعد الموضوع ده اوى و قربته اوى من حياتها ..
بقت تحكيله حتي عن التفاصيل الصغيرة عن حياتها ..
هو قالها : انا مستنى الترم ده يخلص بفارغ الصبر عشان اجي اكلم باباكي ..
هي مكنتش بتحب تخبي عنه اي حاجة مهما كانت حتي لو كانت مش المفروض تقولها ..

و في يوم هو جاي يكلمها عالموبايل لقاها بتعيط ..
و بيسألها : مالك يا حبيبتي في إيه ؟ ..
قالتله و صوتها بيتقطع من البكي : انا خايفة تسيبنى او تبعد عنى ..
هو قالها : إيه اللي بتقوليه ده يا حبيبتي انا مش ممكن اسيبك او ابعد عنك ..
هي إطمنت شوية و قالتله : في سر كبير اوى في حياتي و عايزاك تعرفه .. إنت في يوم من الأيام هتبقي جوزي ولازم تعرف عنى كل حاجة ..
هو إستغرب اوى من كلامها و قالها و كله ترقب : قولي في إيه ..
قالتله : اوعدني الموضوع ده يفضل سر بينا ..
قالها : اوعدك ..
قالتله : انا مش بنت (طبعا اكيد كله فاهم) و للايضاح (not virgin) ..
هو حس وقتها إنه نفسه الأرض تنشق و تبلعه ..
إحساس بالصدمة و الذهول ..
متكلمش ولا كلمة لمدة ربع ساعة ..
بعدها قالها : و ده حصل ازاي و إمتي .. محبش يظلمها في الأول و إختار إنه يسمع منها ..
قالتله : ده من عشر سنين .. حصلتلي حادثة و اكتشفت بعدها إن ده اللي جرا .. (ملحوظة: طبيا الكلام ده ممكن يحصل)
انا عارفة إنك هتشك فيا .. بس صدقنى يا حبيبي هو ده اللي حصل ..


لحد هنا وهنوقف الحكاية ..

============================================

يا تري لو كنت مكان هو ..
كنت هتعمل إيه ؟

وياترى الموضوع دا هيفرق معاك ولا هتقول عادى يابنتى واى المشكلة المهم انك كويسة ؟

رد فعلك هيكون اى سلبى ولا ايجابى ؟؟ ولو سلبى لى ولو ايجابى لى ؟

============================================

تعالو نكمل الحكاية سوى ونشوف حصل اى

هو قرر إنه يعمل نفسه إنه مصدقها..
و عدت فترة و اطمنت البنت إنه مصدقها ..
بس هو قرر إنه يحاول يكتشف ده بنفسه و بدأ يفتح معاها طرق الشيطان و لقي إنها مهاوداه !!
وإنها عندها استعداد تعمل اي حاجة !!
و في الفترة دي عرف إن قريبها ده شخصية زبالة و راجل ممكن يقبل الحرام و ديوث ..
و بدأ يشك في علاقة البنت بقريبها ده ..
و خمن إن هو السبب في اللي حصل ليها و عايز يداري ده في اي حد ..
وكمل معاها و شال تفكير قلبه فيها و فكر بس بغرائزه ..
و البنت مش كانت بتمانع خالص ..


خلص الترم التانى و خلص دراسته ..


و لقيها بتسأله : إنت هتيجي إمتي تقابل بابا ..
قالها : انا لازم اشتغل الأول ..
قالتله : مش اتفقنا اول ما تخلص هتيجي تقابله ..
قالها : الظروف اتغيرت
هي حست إنه كان بيلعب بيها ..
قالتله : انا غلطانة اصلا إنى امنتلك و حكتلك ..
انا كنت خايفة إنك تلعب بيا بس صدقتك و عملت حتي الغلط عشان ارضيك لكن إنت مقدرتش ..
قالها بكل برود : كل شئ قسمة و نصيب ..
قالتله : إيه ؟ يعنى كده خلاص ؟!!
قالها : اللي عملت كده مع حد ممكن تعمله مع حد تانى انا مبقتش اثق في كلامك ..
قالتله : بس انا كنت بعمل ده عشان بحبك .. انا حبيتك و كنت عايزة اعمل اي حاجة عشان ارضيك ..
قالها برد مفاجئ : مين اللي عمل كده فيكي ؟
قالتله : ايه ؟!! هو إنت مش مصدقنى !!
قالها بإصرار : مين اللي عمل كده فيكي ؟
هي قفلت المكالمة و قفلت موبايلها ..
عدي وقت كبير مش كلمو بعض ..
وهو مبقتش فارقة معاه ..
و في يوم لقيها بتتصل ..
رد عليها قالها : نعم ..
قبل ما تقول هي اي حاجة قالتله : وحشتنى ..
مردش ..
قالتله : بقولك وحشتنى ..
قالها : عايزة إيه !!
قالتله : ليه تظلمنى انا كنت بعمل كل حاجة عشانك إنت بس و عمري و الله ما عملتها حد غيرك ..
قالها بعصبية : متجبيش سيرة ربنا ع لسانك ..
إنتي مهما عملتي إنتي كدابة ..
و قفل المكالمة ..
عدت فترة و اتصلت تانى و تالت و مش علي لسانها غير وحشتنى ..
و هو ولا هنا ..
لحد ما زهقت البنت و حست إن محاولاتها كلها فاشلة معاه ..
وسابو بعض ..
و في الوقت اللي بكتبلكم فيه ده بقالهم حوالي سنة ميعرفوش اي حاجة عن بعض تماما !!

======================================

ياترى الى عملو هو دا صح ولا غلط ؟

مين
يفتكر بعد كل ده إن البنت ممكن تكون مش كدابة .. و إنها بجد عملت معاه كده
و سلمته نفسها عشان كانت بتحبه و واثقة فيه .. و هيا مش ليها دعوة بقريبها
الزبالة ده ؟

الصدمة كانت لـ هو فى الأول وفى النهاية بقت لـ هى ؟؟
يترى اى مدى صعوبة صدمة كل واحد فيهم يعنى لو من 10 تدى لكل واحد فيهم قد
اى فى صعوبة الصدمة الى قابلتو ؟

ياترى ان كان دا ولا دا العيب في
الشخص ولا فى الاهل ولا فى الحب ولا فى الصراحة ولا فى الشك ولا فى
التفكير ولا فى التدين ولا ولا ولا ،،،، ؟؟

مستنى اجوبتكم ومشاركتكم معايا

ياريت لو عندك اى قصة تقدر تقولنا عليها ونحطها ونشوف سوى حل للقصتك او حكايتك

مش لازم حكايتك ممكن تكون حكايه عرفتها من حد وأتأثرت بيها

تقدر تشارك معانة بيها واهو أكيد كلنا بنستفيد من بعض

يارب يكون الموضوع يعجبكووووووو