سعر جميل عن حياة الطيور روعه

ياطير وا حلالي بيك

مرتاح من هموم الدنيا ماضاق السهر عينيك



يا طير وا حلالي عليك


صباحات الله ليك بشوشة بتقضيها فوق جنحيك


تتحدى الجبال ووحوشها عارفها ما بتطول عاليك


تلقى الليني والكرموشة رزقك ما فى زول يحميك


توصلها لى جناك مفقوشة مُطامن هى بتكفيك


يا طير وا حلالي عليك


لا مال لا بيوت مفروشة نعم الزائلة ما بتغريك


لا زينة الدهب وكشكوشة لا شققاً تكوس تمليكه


محل ما تمت المخموشة أجلك فيها بيلاقيك


وماك متمنى فى المغشوشة وخلقة الله ياها حُلِيك


يا طير وا حلالي عليك


ماك عاشق المتكى رموشه شان تختاره ليك شريكة


لا زفة عرس لا هوشة من عندو الكريم يهديك


التلقاها صالحة تنوشها شيلته وكتي ليها تحِيكا


واسرابك توقـِّف بوشه ترقصلو الغصون شاديك


يا طير وا حلالي عليك


ما جبت العروس فى الكوشة وإتبسمت فوق كرسيك


وما جيت حنتك منقوشة راسمه ولا مالي ايديك


ماك راجي الكروت وقروشها ولا انسان تقول يديك


فنادقك راحبي واسع حوشها في ضل دوحة ولا اريكة


يا طير وا حلالي عليك


لاك سيد تمرةً محشوشة تحرسه ولا تمسك شيكه


لا ارضك متكي عيوشها وتسند من تقاك الريكه


لا قفة خضار مطقوشة يومي على الله واجبي عليك


لا التلقاها ناوي تحوشه قبلان بال من الله ليك
تجيك


يا طير وا حلالي عليك


تدي اطفالك المدروشة ومونة بكرة ما بتعنيك


جنياتك ملازمي عشوشه وما لاحت كتب في وشيك


لا هم القروش وجيوشه في يوم عكرت صافيك


لا كنب الفصول وبروشه لا كراس ولا استيكة